الوقت الاخباري أعلنت الفنانة الكبيرة إلهام شاهين، أنها قامت بتوثيق تبرعها بأعضائها في الشهر العقاري، من خلال مداخلة هاتفية لها مع برنامج “كلام مهم” الذي يعرض عبر قناة “الشمس”. الوقت الاخباري
اول واحدة نادت بالتبرع بالاعضاءوقالت إلهام شاهين: “أنا أول واحدة ناديت بده واللي نادى قبل الدكتور خالد منتصر.. وأنا كنت معاه مؤيداه جدًا وعشان كده عملت الفيديو ونزلته وقولت إن أنا بنادي الناس فعلًا إن إحنا كلنا نعمل ده لإنه خير.. الواحد بعد ما يموت ما الأعضاء دي هتموت معاه يعني هتخلص هتروح للدود في الأرض ليه محدش يستفيد بيها ترحمه من العذاب ومن الآلام والأوجاع مش هنقول تطول في عمره لإن العمر ده مكتوب لكن ع الأقل هتعيشه الفترة اللي هو عايشها بدون ألم ده أكبر عمل خير”.
التبرع ليس محرما شرعا
وأضافت: “ولا شيخ حرم التبرع بالأعضاء لإن أنا سمعت كل آراء الشيوخ بيقولوا إن ده حلال.. أنا سمعت من رجال الدين كمان الشيخ خالد الجندي ومن أكتر من شيخ إن هو بيقول إن ده شيء حلال جدًا إنك أنت بترحم حد من الألم”.
وتابعت: “الأكيد ربنا مش ممكن هيحرم شيء إنساني بيرحم البشر من الألم لا يمكن أصدق في أشياء العقل والمنطق مفكر فيها ربنا ادانا مخ عشان نفكر بيه إيه اللي هيضر الإنسان بعد ما يموت إنه تتاخد الأعضاء دي واحد أعمى هيعيش مفتح بسبب قرنية محتاجها.. واحد محتاج جزء م الرئة واحد محتاج كبد ولّا قلب ولا كلى.. أنا خلاص مُت هعمل بيهم إيه فيعني بالعقل كده وبالمنطق أي شيء إنساني بيساعد الآخرين لازم يكون حلال”.
واستكملت: “الدولة على فكرة مطلعة القرار ده من زمان من سنين مش فاكرة سنة كام.. فالقانون موجود قانون التبرع بالأعضاء الدولة أقرته لكن هو اللي مطلوب دلوقتي من الدولة تفعيل هذا القانون يعني يحصل إيه لو أنا مُت دلوقتي وأنا قايلة لأهلي أهو تاخدوني فورًا تتبرعوا بأعضائي لإن ليه وقت فلازم يتحركوا بسرعة طب يرحوا فين ومين اللي مريض ومستني في الدور عشان مستني قلب أو مستني كلى أو مستني كبد فدي لازم حاجات يبقى ليها فايلات وأماكن وبنوك الكلام ده بنوك للأعضاء فكل الحاجات دي فين.. يعني أنا عايزة أتبرع بس لو مُت دلوقتي محدش هيعرف يعمل حاجة فهو ده اللي مطلوب من الدولة تفعيل هذا القانون يقولوا للناس تعمل إيه الناس تروح فين لما يكونوا عايزين يتبرعوا بالأعضاء الخطوات إيه بقى إحنا عايزين نعرف ده من الدولة”.
الوقت الاخباري ليلى محمد - متابعات
